RADIO TELEVISION ESPACE 94.1 CH 34
mardi , 12 décembre 2017
Accueil » A la une » Nou Bouke

Nou Bouke

Manifestan

Manifestan“Nou bouke”

Lè yon moun rele anmwe li bouke, se lè li pa kapab ankò. Tankou li tap pote yon chay ki twò lou pou li, rive yon lè li santil pa kapab ankò li rele anmwe li bouke. Sa depan de chay la. Si se yon bon chay, lap mete li atè tou dousman, si se yon move chay pwasenkant, lap souke kò li, li voyel atè ak repiyans.

Sa nou pral di nan lapawoli jodi a, pinga pyès moun di nap mande pèp la leve kanpe. Paske nou menm lè nap pale sou sitiyasyon peyi d Ayiti, nou pa gen okenn sansasyon karese pyès moun ki responsab rayisab yap fè anba tab.

Nou Bouke. Radio Caraïbes  pa janm bouke bay popilas la pale pou di sa li panse chak fwa vakabon pare pou chavire peyi a. Men lè Caraïbes bay pèp la pale pou li di sa li vle, èske reskonsab yo janm reponn egzijans pèp la fè ? Epitou ki egzijans pèp la konn fè yo konsa ?

Li konn mande sispann touye pitit li, sispann voye boule mache kote lap penpennen pennitans li. Li konn mande pou lavi chè a bese. Li konn mande sispann kite yo mouri swaf dlo ak grangou…

Sa gen plis pase 10 lanne depi Beetova Obas te chante : « Si nou viv nou pa moun ». Jodi a si nou kontinye viv nan sitiyasyon yo mete nou la sè ke nou pa konn sa nou vo. Move tan ak tranbleman politik fè lavalas la retanmen desann ak fatra, bwat katon, bout manmit, papye plastik vin konble tout tou rego larepiblik. Yo fè nap viv nan gragou labou marekay, nou pa di anyen, nou reziye n, se tankou nou pa moun ki merite byennèt. Chak jou yon dal nan nou ap plede mouri sasinen anba bal, chak jou nap gade frè nou ak  sè nou kap mouri arebò lari, sou pil fatra nan malpwòpte tankou endijan nou toujou rete menm jan, nou kwaze bra nou nap gade èske sa pap chanje. Nan rete tann chanjman yo pran nou tout pou yon bann kannannan, nou pa janm revòlte poun di nou bouke.

Sa fè kèk tan depi yo fè nap konjige vèb pouvwa ak eleksyon sèlman.

Kimoun pèp la pral bay pouvwa pou vin prezidan ? Kimoun pèp pral bay vwa pou al nan palman ? Kimoun ki dwe minis, kimoun ki dwe direktè nan leta, kimoun ki pral sekretè d Eta ? Poukisa se kesyon sa yo nèg isit toujou ap poze?

yo pa janm poze kesyon kijou yap wete pèp la nan gragou? Kilè jenn gason ak fanm matissan ap sispann benyen nan san ? Kijou moun kafou ap sispann foure pye nan labou pou yo desann lavil?

Pou kisa pèp ki fin vote toujou ap pyange bat lokobe nan salte? Pou kisa byen travay byen swe pa janm egal byen touche ?

Li pa posib pou nou leve chak jou pòtre yon dal moun fou ki pèdi lespwa ki nan fatra. Fatra, se la n dòmi, se la n leve, se la n manje…

Chak swa lè nal dòmi nou toujou ap veye nan nouvèl gran boulva nan ki lòbèy traka peyi a ap leve denmen.

Sa fè plis pase 10 lanne depi Bòb Bovano te chante sou tè sa « Pèp toujou ap lite », men yon jou nan lite fòk sitiyasyon pèp sa ta chanje !

Ou ta di mizè fè pèp la vin saj pa fòs. E se menm sajès sa tout vakabon bandi valpa itilize pou yo egzije moun rele yo depite, ba yo pil lajan pou yo gaspiye, bèl machin vit filme pou yo woule, ba yo pouvwa pou yo fè dilatwa, ba yo tout sa yo bezwen pou pase menm pèp la nan tenten bliyel nan yon kwen pou maleng  li anvlimen.

Anpil gouvnman pase, anpil paleman moute nan non pèp, lèn leve tèt nou gade sa yo rele gouvènman, sa yo rele paleman, epi nou gade pèp la, nap wè ni paleman ni gouvènman yo nan paradi (si gen paradi) epi pèp la nan simityè.

Chak ekip ki bezwen moute sou do pèp, yo tanmen kritike denonse ekip ki anplas la kòmkwa se yo ki posede kle chanjman. Ekip ki la jodi a, tap repwoche ekip ki te la ayè a pou 20 mil dola suit Miki te konn touche kòm pèdiyèm lè lap vwayaje. Èske ekip ki la jodi a desann pri a ? Sou miki li te 20 mil dola vèt, enben jodi a anyen pa janm  chanje. Sim te konn pale franse m tap di : « Le Prix est encore vert » n’est ce pas monsieur le Président?

Sou lòt gouvènman pase, palmantè pat janm konn goumen pou pèp, jodi a se menm bagay la, palmantè fè gwoup pou yo goumen pou ministè, pou yo mete direktè, pou yo gen kontwòl ladwann, ayopò elatriye. Mwen konnen byen sa map di la yo ap fè  yo pa renmen mwen, yap kanpe lwen mwen, men sa pa fè anyen.

Paske jodi a, lè a rive tout bon pou pèp sispann karese zam kap tire sou li a. Se pou nou di nou bouke pannan nap poze kesyon ki enpòtan pou nou yo : « Ki vrè wòl yon palmantè ? èske se fè mache nwa ak manda pèp la ba li a pou l jere biznis pèsonèl li ak ti fanm li, ti fanmi li, ak ti zanmi pèsonèl li ? Ki wòl yon prezidan, ki wòl yon gouvènman ? » Eskè se foure dwèt nan kès leta jouk yo kreve li pou depanse lajan pou bay depite ak senatè pou ride yo kenbe pouvwa menm si pi fò popilas la ap manje fatra ?

« Nou bouke » se yon kout anmwe pou nou pouse pou nou di chay palè, chay palmantè, chay ministè, sekretè ak direktè yo twò lou sou do nou.

Paske se nou ki toujou swe pou yo, se nou ki toujou tonbe pou yo lè nou fin vote pou yo.

Nou bouke mande radyo ak televizyon sispann bay vakabon ak bandi ki al kache nan palman mikwo pou yo betize lasosyete.

Ki sa pèp janm benefisye nan yon depite? Pou ki sa yon palmantè, dilè, malfèktè, gen glis valè pase yon pwofesè nan peyi a? Yo te fòse nou vale miki, miki fòse nou vale pipi pou ji. Jodi a peyi a ap peye yon Prix-Vert ki vle fè plis benefis pase sa li te depanse pou li te ht echap la nan men mafya ak agaman ki nan palman.

« Nou bouke » se yon kout anmwe pou nou pouse pou pèp la di li bouke ak yon palman kote se youn youn grenn palmantè ki fè siksè san li pa vòlè.

Yo relem Bòs Madichon kite melem yo vle makem, sa pa gadem. Pinga pyès moun vin dim o wi map mande pèp la leve kanpe. Wi yon jou se pou pèp la leve kanpe pou li mande palman ak gouvènman regleman. Men yap mande pèp la al vote, apre sa poul rekòlte bal sou konsyans politisyen krizokal.

Annegad de mwen lè yap vin mande pou n al vote konsa, se pou nou tout ta kanpe poun di yo nou resi bouke atò.

Bòs Madichon

 

 

A propos de espace2

Social media & sharing icons powered by UltimatelySocial
2015 Radio Télévision Espace